Y prosiect

Bydd y prosiect yn sicrhau budd net i fioamrywiaeth yn ystod ei oes, gan gynnwys creu ac adfer cynefinoedd. Bydd y gwelliannau hyn, a wneir o dan reolaeth gynefinoedd briodol am gyfnod 40 mlynedd y prosiect, o fudd i fywyd gwyllt ar draws y safle drwy gynyddu ansawdd, amrywiaeth a chysylltedd cynefinoedd.

Rydym wedi cynnal arolygon manwl o adar ar draws y safle, gan gynnwys arolygon o bwyntiau gwylio, tymor bridio, adar ysglyfaethus ac arolygon cerdded yn y gaeaf.

Rhoddwyd sylw arbennig i rywogaethau fel yr Hebog Marthin, y Barcud Coch a’r Cwtiad Aur a allai gael eu heffeithio yn ystod y gwaith adeiladu a / neu a allai fod mewn perygl o wrthdrawiad.

Er mwyn lleihau’r risg, rydym wedi defnyddio modelu risg gwrthdrawiadau i helpu i lunio dyluniad y safle a lleihau effeithiau posibl. Rydym wedi ychwanegu parthau byffer o amgylch safleoedd nythu adar gwarchodedig a bydd Cynllun Diogelu Adar yn tywys y gwaith adeiladu i osgoi aflonyddwch.

Rydym wedi cynnal amrywiaeth o arolygon i ddeall amgylchedd dŵr a chyflwr daear presennol y safle, gan gynnwys astudiaethau desg a gwaith maes. Profwyd pridd mewn amrywiol leoliadau, a mapiwyd yr holl nodweddion dŵr yn ofalus. Mae ardaloedd bach o briddoedd mawnaidd wedi’u nodi a’u hosgoi yn y dyluniad.

Mae nifer o gyflenwadau dŵr preifat ar y safle. Er mwyn eu diogelu, byddwn yn cynnal asesiadau pellach ac yn monitro ansawdd dŵr yn rheolaidd yn ystod y gwaith adeiladu. Bydd y canfyddiadau hyn yn llywio Cynlluniau manwl ar gyfer Rheoli Pridd, Dŵr Wyneb ac Amgylchedd Adeiladu, a ddatblygir gydag arbenigwyr ac a gedwir yn gyfredol drwy gydol y gwaith adeiladu a’r gweithrediad.

Rydym wedi gweithio’n agos â’r Awdurdod Hedfan Sifil, y Gwasanaethau Traffig Awyr Cenedlaethol, a’r Weinyddiaeth Amddiffyn i sicrhau bod ein cynlluniau’n cydymffurfio’n llawn â rheoliadau diogelwch hedfanaeth. O ystyried uchder y tyrbinau, bydd angen goleuadau diogelwch hedfanaeth a lle bynnag y bo modd, bydd y cyfluniad goleuadau terfynol yn cael ei optimeiddio i leihau’r effaith weledol ar yr ardal leol a’r effaith ar awyrennau.

Byddai goleuadau arbennig yn cael eu defnyddio i leihau disgleirdeb tuag i lawr, gan ei wneud yn llai gweladwy oddi isod.

Rydym wedi cwblhau Asesiad Effaith Gweledol a Thirwedd cynhwysfawr, gan adolygu golygfannau allweddol hyd at 28km o dyrbinau mwyaf allanol y safle a 33km o fewn Parc Cenedlaethol Bannau Brycheiniog mewn ymgynghoriad ag arbenigwyr tirwedd Cyngor Sir Powys.

Rydym hefyd wedi cynnal Asesiad Amwynder Gweledol Preswyl manwl o bob eiddo preswyl o fewn 2km o’r safle.

Rydym wedi cynnal asesiadau cefndir archeolegol a hanesyddol helaeth o’r safle a’r ardal gyfagos. Canfu’r asesiadau hyn bedwar ased hanesyddol dynodedig o fewn y safle, ac mae dyluniad y datblygiad arfaethedig wedi ystyried yn ofalus ac wedi osgoi effeithio’n uniongyrchol arnynt. Bydd ein Cynllun Rheoli Amgylcheddol Adeiladu yn nodi mesurau arfer gorau i leihau niwed i asedau hanesyddol heb eu dynodi ac anhysbys yn ystod y gwaith adeiladu.

Bydd effaith sylweddol ar leoliad dau ased hanesyddol dynodedig, sef Crugiau Crwn Bryn Aberedw (Cyf. Cadw. RD074) a Chwt Hir Amgaeëdig Cwmblaenerw (Cyf. Cadw RD169), tra bod y Parc Ynni ar waith. Bydd yr effaith hon yn dod i ben unwaith y bydd y parc wedi’i ddadgomisiynu.

Yn ystod y gwaith adeiladu, byddwn yn cyflogi archaeolegwyr i gadw a chofnodi gweddillion unrhyw asedau heb eu dynodi a allai gael eu heffeithio’n ffisegol, gyda gwaith wedi’i gytuno â Heneb (Ymddiriedolaeth Archaeolegol Clwyd-Powys gynt).

Rydym wedi asesu’r potensial ar gyfer cysgodion symudol mewn eiddo preswyl cyfagos, ffenomen a achosir gan gylchdroi llafnau tyrbinau yn taflu cysgodion ysbeidiol o dan amodau tywydd penodol. Gellir rhagfynegi’r effaith hon yn gywir, a byddwn yn gweithredu mesurau lliniaru megis atal tyrbinau dros dro yn ystod cyfnodau brig cysgodion symudol.

Rydym wedi cynnal gwaith monitro sŵn ac asesiadau effaith trylwyr yn unol ag arfer gorau, deddfwriaeth berthnasol ac mewn ymgynghoriad â Chyngor Sir Powys. Mae hyn yn sicrhau bod terfynau sŵn yn cael eu gosod i amddiffyn trigolion lleol a diogelu amwynder preswyl.

Bydd unrhyw ganiatâd cynllunio a roddir yn cynnwys terfynau sŵn llym, ac rydym wedi cymryd camau drwy ddyluniad y prosiect i sicrhau nad eir heibio i’r terfynau hyn. Bydd sŵn dros dro yn ystod y gwaith adeiladu yn cael ei reoli drwy Gynllun Rheoli Amgylcheddol Adeiladu, sy’n cynnwys oriau gwaith cyfyngedig i leihau aflonyddwch.

Rydym wedi cyfrifo y bydd Parc Ynni Aberedw wedi cynhyrchu digon o ynni gwyrdd o fewn y flwyddyn gyntaf o weithredu i ad-dalu cost carbon ei adeiladu a’i weithredu yn erbyn cymysgedd tanwydd ffosil o gynhyrchu trydan.

Mae’r gost carbon i adeiladu, gweithredu a chynnal a chadw’r Parc Ynni wedi’i chyfrifo yn rhan o’r cais cynllunio. Mae hyn yn cynnwys y carbon a grëir wrth adeiladu’r tyrbinau, y concrit a ddefnyddir yn y sylfeini a’r carbon a ryddheir wrth gloddio sylfeini.

Y prif fynediad ar gyfer Parc Ynni Aberedw fydd trwy gyffordd mynediad wedi’i huwchraddio oddi ar y ffordd C1336.

Bydd y gyffordd mynediad hon yn darparu’r unig fynediad ar gyfer yr holl lwythi annormal sy’n gysylltiedig â danfoniadau’r tyrbinau yn ogystal â mynediad i gerbydau nwyddau trwm sy’n danfon deunydd adeiladu a mynediad i’r gweithwyr adeiladu.

Mae ail bwynt mynediad wedi’i leoli’n uniongyrchol oddi ar yr A481, i’r gogledd o’r Safle, i hwyluso mynediad i’r is-orsaf yn ystod y cyfnod adeiladu a gweithredu yn unig. Ni fydd mynediad o’r is-orsaf i brif ardal tyrbin gwynt y safle.

Bydd unrhyw waith ychwanegol sy’n ofynnol ar gyfer cludo llwythi annormal sydd angen caniatâd ar wahân yn cael ei gyflwyno ar ôl ymgynghori â’r awdurdodau cynllunio a phriffyrdd lleol perthnasol.

Bydd Cynllun Rheoli Trafnidiaeth yn cael ei ddatblygu mewn cydweithrediad â’r heddlu, awdurdodau priffyrdd a chludwyr i sicrhau bod cydrannau’n cael eu cludo’n ddiogel ac yn effeithlon ac i sicrhau cyn lleied o darfu â phosibl, er enghraifft mae’n ystyried amseroedd teithio i’r ysgol a digwyddiadau allweddol.

Mae’r cynllun arfaethedig yn cynnwys newid sylweddol o ran yr is-orsaf arfaethedig.

Yn ystod yr ymgynghoriad Cysylltiad Grid Aberedw a gynhaliwyd gan Green GEN Cymru yn 2024, cynghorwyd y byddai is-orsaf Parc Ynni Aberedw wedi’i lleoli ar ben Bryn Aberedw, gyda llinell uwchben polyn pren i’w chysylltu â gorsaf switsio drydanol a gynigiwyd fel rhan o brosiect Tywi Wysg a’r grid ehangach.

Rydym bellach wedi nodi lleoliad newydd ar gyfer yr is-orsaf wrth droed Bryn Aberedw, gan ddefnyddio ceblau tanddaearol i drosglwyddo pŵer o’r tyrbinau i’r is-orsaf. Bydd y trawsnewidydd grid a’r offer switsio o fewn adeilad, wedi’i gynllunio i edrych fel adeilad amaethyddol i gyd-fynd â’r amgylchedd lleol. Bydd hyn yn agos at yr orsaf switsio trydanol a gynigiwyd fel rhan o brosiect Green Gen Towy Usk.

Mae hyn nawr yn golygu:

• Mae ceblau tanddaearol i’r is-orsaf o bosibl yn dileu’r angen am gysylltiad polyn pren i lawr ochr Bryn Aberedw.

• Llai o effaith weledol o’r is-orsaf a’r cysylltiad grid.

• Tynnu seilwaith o dir comin.

• Mynediad haws i’r is-orsaf oherwydd ei bod wedi’i lleoli wrth ymyl priffordd.

• Mynediad haws i’r rhwydwaith grid.