Cwmni datblygu ynni adnewyddadwy yng Nghymru’n lansio ymgynghoriad am gynlluniau Parc Ynni

Cwmni datblygu ynni adnewyddadwy yng Nghymru’n lansio ymgynghoriad am gynlluniau Parc Ynni

Mae’r cwmni datblygu ynni adnewyddadwy Bute Energy, wedi cyhoeddi cynlluniau ar gyfer Parc Ynni Moel Chwa, a allai gynhyrchu digon o ynni gwyrdd, glân i bweru bron i 52,000 o gartrefi.

Mae’r prosiect yn ymateb i’r Argyfwng Hinsawdd a bydd yn helpu cymunedau lleol i fyw bywydau trydan modern, gan hefyd gefnogi targed Llywodraeth Cymru i sicrhau bod 100% o’n trydan yn adnewyddadwy erbyn 2035.

Bydd y gwaith arfaethedig, Parc Ynni Moel Chwa, gerllaw Llanfihangel Glyn Myfyr yng Nghonwy, a bydd yn cynnwys 12 tyrbin sy’n mesur hyd at 200m at y blaen uchaf. Unwaith y bydd yn weithredol, gallai’r Parc Ynni gynhyrchu tua 79.2MW o drydan adnewyddadwy a bydd yn cysylltu â’r Grid Cenedlaethol mewn is-orsaf newydd gerllaw Gwyddelwern, tua 7km o’r Parc Ynni. Bydd y cysylltu’n digwydd drwy linell uwchben ar bolion pren.

Mae Bute Energy yn ymroddedig i gefnogi a chydweithio â’r cymunedau lle maen nhw’n datblygu eu prosiectau. Yn rhan o brosiect Parc Ynni Moel Chwa, bydd Cronfa Budd Cymunedol yn cael ei sefydlu a rhagwelir ar hyn o bryd y bydd hon yn darparu buddsoddiad sydd werth tua £590,000 y flwyddyn yn lleol.

Yn ogystal â’r gronfa, mae Bute Energy wedi ymrwymo i sicrhau bod cymaint ag y bo modd o’r buddsoddiad yn aros yn lleol. Mae tîm Budd Cymunedol y cwmni’n canolbwyntio ar greu llwybrau i bobl leol sicrhau swyddi, cael y mynediad gorau i’n parciau ynni a gweithio gydag ysgolion lleol a chyfleusterau cymunedol i helpu i ostwng eu biliau ynni a’u hôl-troed carbon.

Bydd rownd gyntaf ymgynghoriad cyhoeddus ar waith tan Ddydd Sul 11 Mehefin 2023, gyda sesiynau galw heibio cyhoeddus fydd yn gadael i bobl weld gwybodaeth a dweud eu dweud. Bydd y cwmni’n rhannu gwybodaeth gyda’r bobl hynny sy’n byw gerllaw’r prosiect, ar hyd llwybr cysylltu’r grid, a gyda busnesau a sefydliadau eraill.

Yn y rownd gyntaf hon o’r ymgynghoriad, byddai Bute Energy yn hoffi clywed barn y gymuned leol am eu cynigion cyntaf. Bydd tîm Budd Cymunedol Bute Energy yn mynd i’r digwyddiadau, gan ganolbwyntio ar ganfod grwpiau a gwasanaethau lleol i ymgysylltu â nhw yn awr er mwyn deall anghenion a gobeithion y cymunedau, a sut y gall buddsoddiad sicrhau’r budd mwyaf i’r ardal leol.

Meddai John Reilly, Rheolwr Prosiect yn Bute Energy:

“Fel cenedl, rydym mewn argyfwng hinsawdd ac argyfwng costau byw. Mae digwyddiadau byd-eang yn bygwth ein cyflenwad ynni. Ac eto mae potensial diddiwedd i ynni adnewyddadwy yng Nghymru – yn enwedig gan y gwynt sy’n chwythu ar draws ein bryniau a’n mynyddoedd. Mae Bute Energy yn cymryd camau yn awr i helpu i ddarparu ynni glân gwyrdd i’n cartrefi a’n busnesau, gan ostwng ein dibyniaeth ar danwyddau ffosil a chefnogi targed Llywodraeth Cymru i sicrhau bod 100% o’n trydan yn adnewyddadwy erbyn 2035.

“Rydym eisiau clywed barn pobl leol am ein cynlluniau, fel y gallwn roi ystyriaeth i’w sylwadau wrth i ni ddatblygu’r prosiect. Ac rydym eisiau clywed gan bobl leol sut y gallwn helpu i gefnogi prosiectau a mynd i’r afael â phroblemau mewn cymunedau o amgylch y safle – er mwyn i ni allu darparu buddion go iawn i bobl leol.”

Yn dilyn y rownd hon o ymgynghoriad cyhoeddus, byddwn yn rhoi ystyriaeth ofalus i’r holl adborth a dderbyniwn, ynghyd ag adroddiadau o arolygon amgylcheddol a thechnegol, cyn cynnal rhagor o ymgynghori â’r cyhoedd.

Gallwch glywed rhagor, a chael atebion i’ch cwestiynau yn un o’r sesiynau galw heibio cyhoeddus.

• Dydd Mercher 10 Mai 2023, 2pm – 8pm, Ystafell y Plwyf Cerrigydrudion, Cerrigydrudion, Conwy, LL21 9SR,
• Dydd Iau 11 Mai 2023, 11am – 5pm, Ystafell Gynhadledd Rhug, Ystâd Rhug, Corwen, Sir Ddinbych, LL21 0EH,
• Dydd Mawrth 16 Mai 2023, 2pm – 8pm, Neuadd Bentref Melin y Wig, Corwen, Sir Ddinbych, LL21 9RE

Gallwch weld gwybodaeth hefyd, a rhoi adborth, ar wefan y prosiect: www.moelchwaenergypark.wales.

Mae safle’r Parc Ynni arfaethedig mewn Ardal wedi ei Rhagasesu ar gyfer ynni gwynt graddfa fawr ar y tir yn ôl Fframwaith Datblygiad Cenedlaethol Llywodraeth Cymru: Cymru’r Dyfodol: Y Cynllun Cenedlaethol 2040. Bydd y parc arfaethedig, Parc Ynni Moel Chwa, yn cynhyrchu mwy na 10MW o ynni, felly mae wedi ei gategoreiddio’n Ddatblygiad o Arwyddocâd Cenedlaethol. Mae hyn yn golygu y bydd Bute Energy yn gwneud cais i PEDW (Penderfyniadau Cynllunio ac Amgylchedd Cymru), a fydd yn gwneud argymhelliad i Weinidogion Cymru, p’un a ddylent roi caniatâd cynllunio ai peidio. Ar hyn o bryd disgwylir i Bute Energy gyflwyno cais cynllunio i PEDW yn 2024, yn dilyn ymgynghoriad trwyadl â’r cyhoedd.

Mae gan Bute Energy weledigaeth am Gymru sy’n fwy iach a chyfoethog ac sy’n defnyddio cynhyrchiad ynni fel pŵer cadarnhaol i’r byd, i Gymru, i gymunedau lleol – i’r genhedlaeth hon a chenedlaethau’r dyfodol. Mae’r cwmni wedi ei seilio yng Nghaerdydd ac mae’n mynd i’r afael â’r Argyfwng Hinsawdd drwy bweru Cymru gydag ynni glân a gwyrdd, ac yn pweru ein cymunedau drwy fuddsoddiad, swyddi a sgiliau.

Mae Bute Energy yn bwriadu adeiladu ffermydd gwynt a solar ar hyd a lled Cymru a fydd yn helpu i gyflawni targedau Sero Net y Llywodraeth, yn gwresogi cartrefi, pweru busnesau, a gwefru cerbydau trydan. Mae gwynt atraeth yn un o’r dewisiadau mwyaf cost effeithiol i drydan newydd yn y DU – yn rhatach na nwy, niwclear, glo a deunyddiau adnewyddadwy eraill. Bydd hyn yn gostwng ein dibyniaeth ar danwyddau ffosil wedi eu mewnforio.

Bydd y prosiectau cynhyrchu ynni hyn yn bartneriaeth rhwng Bute Energy a phobl Cymru a byddent yn galluogi buddsoddiad ariannol mawr mewn cymunedau gerllaw. Am ein bod yn gwmni sydd wedi ei seilio yng Nghaerdydd, byddwn yn gwneud y defnydd gorau o gadwynau cyflenwi yng Nghymru ac yn buddsoddi mewn cynlluniau hyfforddi a chyfleoedd prentisiaeth yn lleol er mwyn cael effaith hirdymor